Karen Baptist Convention

ၦၤကညီဘျၢထံခဝ့ရှၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ် ခိၣ်နၢ်ဝဲၤကျိၤအိၣ်ဒီး တၢ်မၤလိတၢ်ရဲၣ်တၢ်ကျဲၤလၢအမ့ၢ် '' သူၣ်ဂ့ၢ်သးကျိၤအတၢ်ကဲခိၣ်ကဲနၢ် ဒီးတၢ်မၤယွၤအတၢ်မၤ'' (၁)သီတၢ်မၤလိန့ၣ်လီၤ. တၢ်မၤလိအံၤ ဘၣ်တၢ်အိးထီၣ်အီၤလၢ သရၣ်ကၠဲးဖရံၣ်လ့ အတၢ်ထုကဖၣ်န့ၣ်လီၤ. ၦၤလၢအဟ့ၣ်တၢ်သိၣ်လိမ့ၢ်ဝဲ သရၣ်မုၣ်ဒိၣ်ဒီးကထၢၣ်စ့လွဲၢ်ဝါန့ၣ်လီၤ.  တၢ်မၤလိအဆၢကတီၢ်မ့ၢ်ဝဲ-ဂီၤ(၉း၃ဝ)တုၤ ဟါ (၄းဝဝ)နၣ်ရံၣ် ဒီးဘၣ်တၢ်မၤအီၤဖဲ လါမၢ်ရှး(၅)သီႇ ၂ဝ၂၆အနံၤ လၢ(၃၉၆)တၢ်အိၣ်ဖှိၣ်ဒၢးန့ၣ်လီၤ. ၦၤကတိၤစံးဘျုး သရၣ်သိၣ်လိတၢ် မ့ၢ်ဝဲသရၣ်ဆၣ်ထူကီၢ် ဒီးတၢ်ထုကဖၣ်ဆၢဂ့ၤလၢ သရၣ်အဲၣ်ဘျုးန့ၣ်လီၤ. ၦၤဟဲထီၣ်တၢ်မၤလိခဲလၢာ် အိၣ်ဝဲ (၁၇)ဂၤန့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်ဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီးတၢ်မၤလိ လၢအမ့ၢ် Spiritual Leadership တၢ်မၤလိဖဲ ၅.၃.၂ဝ၂၆ အနံၤႇ တၢ်လီၢ်မ့ၢ်ဖဲ (၃၉၆) ခဝ့ၡၢၣ်ဝဲၤလီၢ်ႇ တၢ်အိၣ်ဖှိၣ်အဒၢး န့ၣ်လီၤ. ၦၤဟဲထီၣ်တၢ်မၤလိတဖၣ်မ့ၢ်ခဝ့ၡၢၣ်ဝဲၤလီၢ် ၦၤမၤသကိးတၢ်တဖၣ်ခဲလၢ၁်အိၣ်ဝဲ (၁၆)ဂၤ ဒီး ၦၤသိၣ်လိတၢ်မ့ၢ်ဝဲ သရၣ်မုၣ်ဒိၣ်ဒီးကထၢၣ်စ့လွဲၣ်ဝါန့ၣ်လီၤ. တၢ်မၤလိတဘျီအံၤ မ့ၢ်တၢ်လၢအဂ့ၤဝဲ ဒိၣ်မး လၢခိၣ်နၢ်သ့ၣ်တဖၣ်အတၢ်ဒိၣ်ထီၣ် ထီထီၣ်လၢနီၢ်သးအတၢ်ပ၁်သူၣ်ပ၁်သးႇ အတၢ်ဆိကမိၣ် သ့ၣ်တဖၣ်အဂီၢ်အဃိ မ့ၢ်တၢ်ကဲဘျုးလၢ ခါဆူညါခိၣ်နၢ်တဖၣ်အဂီၢ်န့ၣ်လီၤ.

ၦၤကညီဘျၢထံခဝ့ရှၢၣ် သရၣ်သမါဝဲၤကျိၤ အိၣ်ဒီး သၢလါတဘျီတၢ်မၤလိ ဒီးဖဲ လါမၢ်၇ှး(၃)သီႇ ၂ဝ၂၆အနံၤ အိၣ်ဒီး တၢ်ဟ့ၣ်ခီဟ့ၣ်နီၤတၢ်ဂ့ၢ်ဘၣ်ထွဲ ‘’သနၢၣ်(၉)ဘိလၢ တၢ်အိၣ်ဖှိၣ်တၢ်ဂုၤထီၣ်ပသီထီၣ်" န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ- သရၣ်ဒိၣ်စၢ်ဟ့ၣ်ဂ့ၤ (ၦၤနဲၣ်တၢ်ႇ သရၣ်သမါဝဲၤကျိၤ)   ၦၤသိၣ်လိတၢ်မ့ၢ်ဝဲ LIGHT WHEEL Team ဒီးတၢ်မၤလိအံၤ ဘၣ်တၢ်မၤအီၤလၢဆဲးကျိးန့ၢ်တီၤန့ၣ်လီၤ. ၦၤဟဲထီၣ် တၢ်မၤလိ(devices) ခဲလၢာ်အိၣ်ဝဲ (၅၃)ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီး တၢ်ကတိၤလီၤဆီလၢအမ့ၢ် တၢ်အိၣ်ဖှၣ်အမူးအရၢ် ဒီးဘၣ်တၢ်ဟ့ၣ်ခီဟ့ၣ်နီၤအီၤလၢ သရၣ်ဒိၣ်စၢ်ဟ့ၣ်ဂ့ၤ (ၦၤနဲၣ်တၢ်ႇ သရၣ်သမါဝဲၤကျိၤ) ဖဲ လါမၢ်ရှး (၃)သီႇ ၂ဝ၂၆ အနံၤ ဟါ(၇)နၣ်၇ံၣ်န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ- သရၣ်မုၣ်မူယဲၢ်ဖီ(ၦၤနဲၣ်တၢ်ႇ တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ)န့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်မၤအီၤလၢ ဆဲးကျိးန့ၢ်တီၤဒီး ၦၤဟဲထီၣ်တၢ်ရဲၣ်တၢ်ကျဲၤခဲလၢာ် လၢdevices (၄၄) ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထဲတွုၤအိၣ်လိာ်သးဝဲၤကျိၤသုးကျဲၤတီခိၣ်ရိၣ်မဲ ''AI Basic In a Day" တၢ်မၤလိ လၢဝဲၤလီၢ်ၦၤမၤသကိးတၢ်တဖၣ်အဂီၢ် ဒီး တၢ်မၤလိအံၤဘၣ်တၢ်မၤအီၤဖဲ လါဖ့းဘြူၤအါရံၤ(၂ဝ)သီႇ ၂ဝ၂၆အနံၤ န့ၣ်လီၤ.တၢ်မၤလိအလီၢ်မ့ၢ်ဝဲ ၃၉၆, ဘိၣ်ခၠူးကျဲႇ လါမတီၣ်ႇ တၢ်အိၣ်ဖှိၣ်ဒၢးန့ၣ်လီၤ.အိၣ်ဒီး တၢ်အိးထီၣ်တၢ်မၤလိလၢ တၢ်ဘူၣ်သကိးဘါသကိးန့ၣ်လီၤ.တၢ်ဘါကတီၢ် ၦၤပၢၤလီၢ်ဆ့ၣ်နီၤ-သရၣ်မုၣ်ဒီးကထၢၣ်ဂ့ၤဂ့ၤထူႇ တၢ်ဟ့ၣ်ဂံၢ်ဟ့ၣ်ဘါ ဒီးတၢ်ထုကဖၣ်လၢ သရၣ်မုၣ်ခၠိၣ်ခၠိၣ်ဖၠူၣ်(ဝဲၤဒၢးခိၣ်)န့ၣ်လီၤ. သရၣ်သိၣ်လိတၢ်မ့ၢ်ဝဲ-သရၣ်မ့လဲးန့ၣ်လီၤ. အိၣ်ဒီးတၢ်မၤလၤကပီၤ သရၣ် ကတီၢ် ၦၤပၢၤလီၢ်ဆ့ၣ်နီၤ-သရၣ်ကၠဲးစၢၣ်ကၠါႇ တၢ်ကတိၤဒိၣ်သရၣ်-သရၣ်အဲၣ်ဘျုးႇ တၢ်ထုကဖၣ်-သရၣ်တီလိၤမူန့ၣ်လီၤ. ဝဲၤကျိၤ(၁ဝ)ကျိၤလၢအမ့ၢ်- ပိာ်ခွါဝဲၤကျိၤႇ ပိာ်မုၣ်ဝဲၤကျိၤႇ ထုးထီၣ်ရၤလီၤလံာ်လဲၢ်ဝဲၤကျိၤႇ တၢ်သးခုကစီၣ်ဒီးမံးၡၢၣ်ဝဲၤကျိၤႇ တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ယွၤဂ့ၢ်ပီညါဝဲၤကျိၤႇ လံာ်လဲၢ်ဒီးတၢ်ဆဲးတၢ်လၤဝဲၤကျိၤႇ တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤႇ ဝဲၤကျိၤလၢသးစၢ်တၢ်မၤဂီၢ်ႇ ခရံာ်ဖိတၢ်မၤဂ့ၤမၤစၢၤဒီး တၢ်ဂုၤထီၣ်ပသီထီၣ်ခိၣ်နၢ်ဝဲၤကျိၤ ဒီးခၢၣ်စး ၦၤဟဲထီၣ်အိၣ်ဝဲ(၂ဝ)ဂၤန့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်ကဟုကယ၁်ဒီးတၢ်ကူၢ်လိ၁်တၢ်ဝဲၤကျိၤ အိၣ်ဒီးတၢ်ကတိၤလီၤဆီလၢအမ့ၢ် NIPAH Healthcare Awareness  ဖဲ ၅.၂.၂ဝ၂၆ အနံၤႇ ဟါ ၂း၃ ဝဖဲ ခိလ်ကညီဘျၢထံတၢ်အိၣ်ဖှိၣ်န့ၣ်လီၤ. တၢ်ကတိၤလီၤဆီလၢ ခဝ့ၡၢၣ်ဝဲၤလီၢ်ၦၤမၤတၢ်ဖိသ့ၣ်တဖၣ်အဂီၢ်အံၤ ဘၣ်တၢ်ဟ့ၣ်ခီဟ့ၣ်နီၤအီၤလၢ သရၣ်ဒီးကထၢၣ်အဲၣ်ဖှိၣ်ထူ ဒီး ၦၤဟဲထီၣ်တၢ်မၤလိသ့ၣ်တဖၣ်အိၣ်ဝဲ ၄၅ဂၤ ဃၣ်ဃၣ်န့ၣ်လီၤ.

ၦၤကညီဘျၢထံခဝ့ၡၢၣ် ၦၤမၤကစၢ်ယွၤတၢ်မၤလၢ မံမုာ်လၢခရံာ်ပူၤလၢ (၂ဝ၂၅)နံၣ်

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် အိၣ်ဒီး တၢ်ပာ်ဖျါထီၣ် တၢ်သးဝံၣ်သတြီၤတဖၣ်အစၢ တၢ်ရဲၣ်တၢ်ကျဲၤလၢဆဲးကျိးန့ၢ်တီၤ ဖဲလါယနူၤအါရံၤ ဟါ(၇:ဝဝ)နၣ်ရံၣ်ႇ ၂ဝ၂၆အနံၤန့ၣ်လီၤ. ခွါထဲးတၢ်သးဝံၣ် န့ၣ် ကီၢ်(၁၅)ဘ့ၣ်နုာ်လီၤသတြီၤ ဝဲ ဒီး ၦၤဒိးန့ၢ်ခိၣ်ဖးတဖၣ်မ့ၢ်ဝဲ- ကီၢ်ပသံၣ်မၠီမၠး(ခိၣ်ဖးတၢ), တီအူကီၢ်ကဲၤခၢၣ်ကဲၤဘါ (ခိၣ်ဖးခံ), ဒီး ကီၢ်တကူၣ်(ခိၣ်ဖးသၢ)န့ၣ်လီၤ. ၦၤကွဲးခွါထဲးတၢ်သးဝံၣ်မ့ၢ်ဝဲ-သရၣ်ဒိၣ်အဲၣ်လီၤလးန့ၣ်လီၤ.စံၣ်ညီၣ်ကွီၢ်တဖၣ်မ့ၢ်ဝဲ -သရၣ်ဒိၣ်အဲၣ်လီၤလးႇ သရၣ်ဒိၣ်ကျိာ်ထူကၠံႇ သရၣ်မုၣ်တၢ်မျၢ်ဖီ တဖၣ်န့ၣ်လီၤ. The best Soprano မ့ၢ်ဝဲ ကီၢ်ဒဝဲၣ်ဘျံးႇ The best Alto မ့ၢ်ဝဲ ကီၢ်ကယါမိၢ်ၦၢ်ႇ The best Tenor မ့ၢ်ဝဲ ကီၢ်ပကိတကူၣ် ဒီး The best Bass မ့ၢ်ဝဲ-ကီၢ်ဘျံးတဖၣ်န့ၣ်လီၤ. ဒ်န့ၣ်အသိး ကရူၢ်တၢ်သးဝံၣ် ကီၢ်(၁၂)ဘ့ၣ်နုာ်လီၤသတြီၤသကိး ဝဲ ဒီးခိၣ်ဖးတၢမ့ၢ်ဝဲ- ကီၢ်ကယါမိၢ်ၦၢ်ႇ ခိၣ်ဖးခံ-ကီၢ်တီအူပကူႇ ခိၣ်ဖးသၢ-ကီၢ်ဒဝဲၣ်ဘျံးဒိးန့ၣ် ဝဲဒၣ်စုာ်စုာ် လီၤ.ၦၤကဲွးကရူၢ်တၢ်သးဝံၣ်မ့ၢ်ဝဲ- သရၣ်အဲၣ်ဘျုးဝါ(ကီၢ်မၠီမၠး)န့ၣ်လီၤ. စံၣ်ညီၣ်ကွီၢ်တဖၣ်မ့ၢ်ဝဲ -သရၣ်အဲၣ်ဘျုးဝါႇ သရၣ်မုၣ်စဲလံၣ်အီၣ်ႇ သရၣ်ဖရဲးကလ့မူတဖၣ်န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤ အံၤခဲလၢာ်အိၣ်ဝဲ devices  အခါ ၁ဝဝန့ၣ်လီၤ.

ၦၤကညီဘျၢထံခဝ့ၡၢၣ်လံာ်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး တၢ်ပြၢ-ကညီတၢ်ဆဲးတၢ်လၤဒီး တၢ်စံၣ်စိၤတဲစိၤလၢ ဆဲးကျိးန့ၢ်တီၤ ဖဲယနူၤအါရံၤ ဟါ(၆:ဝဝ)နၣ်ရံၣ်ႇ ၂ဝ၂၆အနံၤ န့ၣ်လီၤ. ကီၢ်လၢအဟဲနုာ်လီၤသတြီၤတၢ်မ့ၢ်ဝဲ ကီၢ်တကူၣ်ႇ ကီၢ်ပသံၣ်မၠီမၠးႇ ကီၢ်တီအူသၣ်တီၣ်ဘှဲမိၤၦၤ, တီအူကီၢ်ကဲၤခၢၣ်ကဲၤဘါႇ ကီၢ်ဆီထံးႇ ကီၢ်ပၠံၣ်-သၣ်ယၣ်ဝတံၣ်ႇ ကီၢ်ထးခီႇ ကီၢ်မၠီမၠးႇ ပ.ဘ.ယ. ဖခၢၣ်စးတဖၣ်န့ၣ်လီၤ. ၦၤလၢအမၤန့ၢ်ခိၣ်ဖးတၢမ့ၢ်ဝဲ- သရၣ်ကဘီဖိ(ပ.ဘ.ယ.ဖ), ခိၣ်ဖးခံမ့ၢ်ဝဲ-သရၣ်မုၣ် နီၢ်သီတူၢ်ထူ(ကီၢ်တကူၣ်), ခိၣ်ဖးသၢမ့ၢ်ဝဲ-သရၣ်မုၣ်ဘှ့ၣ်ကပီၤမူ(ကီၢ်မၠီမၠး)တဖၣ်န့ၣ်လီၤ. စံၣ်ညီၣ်ကွီၢ်တဖၣ်မ့ၢ်ဝဲ- သရၣ်ဒိၣ်ဒီးကထၢၣ်စ့စီႇ သရၣ်မုၣ်ခၠိၣ်ခၠိၣ်ဖၠူၣ် ဒီးသရၣ်မုၣ်ဆၣ်စ့လွဲၢ်တဖၣ်န့ၣ်လီၤ. တၢ်ရဲၣ်တၢ်ကျဲၤတဘျီအံၤ ၦၤဟဲထီၣ် ဟ့ၣ်ဂံၢ်ဟ့ၣ်ဘါလၢ ဆဲးကျိးန့ၢ်တီၤလၢ devices (၅၆)ခါ, live streaming စ့ၢ်ကီးပၦၤကလုၢ်တဖၣ် ဟ့ၣ်ဂံၢ်ဟ့ၣ်ဘါသကိးဝဲဒၣ်န့ၣ်လီၤ.

မ့ၢ်လၢကစၢ်ယွၤအဘျုးအဖှိၣ်အတၢ်ဆိၣ်ဂ့ၤအဃိ တနံၣ်အံၤဒိးန့ၢ်ဘၣ်တၢ်ခွဲးတၢ်ယာ်လၢ လဲၤတုၤအိၣ်သကိး ဒီးမၤသကိးဘၣ်တၢ်လၢကီၢ်ကယါဘျၢထံလံာ်စီဆှံကၠိႇတၢ်ပျၢ်ကၠိတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲ ကွဲၢ်သီဒီတၢ်ဘါယွၤသ ရိာ် ဒီးတၢ်ဆၢကတီၢ်မ့ၢ်ဝဲ၈.၁.၂ဝ၂၆နံၣ် ဂီၤ၉:ဝဝနၣ်ရံၣ်
န့ၣ်လီၤ. ၂ဝ၂၅-၂ဝ၂၆တၢ်မၤလိနံၣ်အဂီၢ်ၦၤဖျိထီၣ်L.Th ၅ဂၤ Special ၈ဂၤ  BTs ၉ဂၤ ခဲလၢာ်ပာ်ဖှိၣ်၂၂ဂၤန့ၣ်လီၤ. လၢတၢ်ပျၢ်ကၠိတၢ်ရဲၣ်တၢ်ကျဲၤအပူၤအိၣ်ဃု၁်ဒီး တၢ်မၤလၤကပီၤ သရၣ်ဆၢန့ၢ်အ့ (သရၣ်သိၣ်လိတၢ်လၢာ်ဆၢလၢာ်ကတီၢ်) လၢအမၤသကိးတၢ်ဒီးကၠိအံၤ ၦဲၤထီၣ်(၂ဝ)နံၣ်အဃိန့ၣ်လီၤ.တၢ်ဆၢကတီၢ်ႇ တၢ်အိၣ်သးတၢ်ကီတၢ်ခဲ တၢ်ဘၣ်ယိၣ်အလီၢ်အိၣ်ဝဲသနာ်က့ တၢ်ပျၢ်ကၠိတၢ်ရဲၣ်တၢ်ကျဲၤဘၣ်တၢ်မၤဝံၤအီၤ ဃံဃံလၤလၤ ခီဖျိယွၤအဘျုးအတၢ်ဆိၣ်ဂ့ၤအဃိန့ၣ်လီၤ.