Karen Baptist Convention

ကီၢ်တီအူသၣ်တီၣ်ဘှဲမိၤၦၤ တၢ်အိၣ်ဖှိၣ်သကိးတၢ်အိၣ်ဖှိၣ် အိၣ်ဒီး(၂ဝ၂၅-၂ဝ၂၆)နံၣ် နံၣ်ကတၢၢ်ပၢဆှၢတၢ်ကမံးတံာ်တၢ်အိၣ်ဖှိၣ် ဖဲလါမၢ်ၡး (၂၃ တုၤ၂၅)သီႇ လၢကဲဒိၣ်လူၢ်ကညီဘျၢထံခရံာ်တၢ်အိၣ်ဖှိၣ်ႇ ကရူၢ်(၇)အတၢ်တူၢ်လိာ်မၤသကိးတၢ်န့ၣ်လီၤ.အိၣ်ဒီး တၢ်တိာ်ထူမ့ၢ်ဝဲ- ''ယိာ်ထီၣ်လၢတၢ်နာ် ဆူၣ်ထီၣ်လၢတၢ်မၤ'' န့ၣ်လီၤ. ဒီတနံၣ်ကီၢ်တၢ်သးခုကစီၣ်အတၢ်ဖံးတၢ်မၤတဖၣ်ႇ ဝဲၤကျိၤႇ ကရၢအတၢ်ဖံးတၢ်မၤတဖၣ်ႇ တၢ်တၤတၢ်မ့ၢ်အိၣ်ဝဲဘၣ်ဆၣ် မၤဘၣ်အီၤဂ့ၤဂ့ၤဘၣ်ဘၣ်စ့ၢ်ကီးန့ၣ်လီၤ. ကီၢ်ပၢဆှၢတၢ်ကမံးတံာ်တဖၣ် သူၣ်ဆူၣ်သးဂဲၤႇ ဆီၣ်ထွဲမၤသကိးတၢ်ဒီး ကီၢ်တၢ်သးခုကစီၣ်တၢ်ဖံးတၢ်မၤတဖၣ် ဒ်အလီၢ်အိၣ်အသိး ကဲထီၣ်မးတၢ်ဘျုးတၢ်ဖှိၣ်လၢ တၢ်လဲၤထီၣ်လဲၤထီကဂ့ၤထီၣ်အဂီၢ်န့ၣ်လီၤ. ၂၃.၃.၂ဝ၂၆ နံၤ တူၢ်ဖှိၣ်ဟါ(၆းဝဝ)နၣ်ရံၣ် ဒီးတၢ်အိးထီၣ်တၢ်ရဲၣ်တၢ်ကျဲၤဝံၤ ပိာ်ထွဲထီၣ်အခံလၢ ဝဲၤကျိၤႇ ကရၢတဖၣ်တၢ်ဟ့ၣ်လီၤက့ၤႇ လံာ်တၢ်မၤလၤကပီၤ လၢၦၤဖျိထီၣ်လံာ်စီဆှံကၠိတဖၣ်ႇ ၦၤမၤတၢ်သးခုကစီၣ်ၦဲၤထီၣ်(၂၅)နံၣ်ဆူအဖီခိၣ်တဖၣ်ႇ ဃုာ်ဒီးသရၣ်ဒိၣ် သရၣ်မုၣ်ဒိၣ်လၢဒိးန့ၢ်ဘၣ်(MOCS)တဖၣ်ႇ ၦၤလၢမၤဝံၤတၢ်မၤလိလံာ်စီဆှံခီဖျိတၢ်ကွဲးတဖၣ်ႇ ခိၣ်ဖးတဖၣ်လၢ ၦၤနုာ်လီၤသတြီၤ ကီၢ်ဒီးခဝ့ၡၢၣ်သုးကျဲၤမၤဝဲတဖၣ်ႇ တၢ်တူၢ်လိာ်ပိာ်ခွါကရၢအသီ လၢနုာ်လီၤဘျးစဲအသးဆူ ကိၢ်ပိာ်ခွါဝဲၤကျိၤ တၢ်ရဲၣ်တၢ်ကျဲၤတဖၣ်န့ၣ်လီၤ.၂၄.၃.၂ဝ၂၆ နံၤ အိၣ်ဒီးတၢ်ကတဲာ်ကတီၤဘှီဘၣ်မၤဂ့ၤထီၣ် တၢ်သိၣ်တၢ်ဘျၢဒီး တၢ်သိၣ်တၢ်သီ အလံာ်ပူၤတၢ်ဂ့ၢ်လၢအလိၣ်တဖၣ်လၢ ပၢဆှၢတၢ်ကမံးတံာ်အပတီၢ်န့ၣ်လီၤ.(၂၅.၃.၂ဝ၂၆)နံၤ အိၣ်ဒီးတၢ်အိၣ်ဖှိၣ်ဒီးတၢ်ပာ်ဂၢၢ်ပာ်ကျၢၤတၢ်ဂ့ၢ်တၢ်ကျိၤ တၢ်စံၣ်ညီၣ်အၢၣ်လီၤတဖၣ်န့ၣ်လီၤ.