Karen Baptist Convention

ၦၤကညီဘျၢထံခဝ့ၡၢၣ် နံၣ်ကယၤ(၂၁)မံးၡၢၣ်တၢ်တိာ်ကျဲၤသၢပတီၢ်တပတီၢ် ကရူၢ်(၁) တၢ်ဃုထံကရူၢ် အိၣ်ဒီး တၢ်ကွၢ်ကဒါက့ၤ တၢ်ဃုထံတၢ်ရဲၣ်တၢ်ကျဲၤဖဲ လါဖ့းဘြူၤအါရံၤ(၁၈-၁၉), ၂ဝ၂၆ အနံၤန့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ ၁၂၁(ဃ) နံၣ်တကယၤ တၢ်စံးဘျုးတၢ်သူၣ်ထီၣ်အလူၣ်ႇ ဝ့ၢ်တကူၣ်န့ၣ်လီၤ. တၢ်အိးထီၣ်တၢ်ရဲၣ်တၢ်ကျဲၤ ဘၣ်တၢ်မၤအီၤဖဲ (၁၈.၂.၂ဝ၂၆)ဂီၤ(၈းဝဝ)နၣ်ရံၣ် ဒီး လၢတၢ်ဘူၣ်တၢ်ဘါကတီၢ် ၦၤပၢၤလီၢ်ဆ့ၣ်နီၤ- သရၣ်မုၣ်ဆၢန့ၢ်ဂ့ၤႇ ၦၤဟ့ၣ်တၢ်ကစီၣ်မ့ၢ်ဝဲ-သရၣ်မုၣ်ဒိၣ်ဒီးကထၢၣ်လ့ထူ(နဲၣ်ရွဲၣ်သဃဲၤ)ႇ တၢ်ထုကဖၣ်- သရၣ်မုၣ်ကၠူဖီ တဖၣ်န့ၣ်လီၤ.ကူၣ်သ့ဂံၢ်ထံးလၢ မၤသကိးတၢ်တဖၣ်မ့ၢ်ဝဲ-သရၣ်လဲမယၢၣ် ဒီး သရၣ်မုၣ်နံထၣ်တဖၣ်န့ၣ်လီၤ.တၢ်ပျၢ်က့ၤတၢ်ရဲၣ်တၢ်ကျဲၤလၢ တၢ်ဘူၣ်တၢ်ဘါကတီၢ်- ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်မုၣ်ဒီးကထၢၣ်ကၠဲပလံႇ တၢ်ကစီၣ်-သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤ), ဒီး တၢ်ထုကဖၣ်-သရၣ်ဒိၣ်မူလၢၢ်ဂ့ၤ(ကီၢ်ပသံၣ်မၠီမၠးနဲၣ်ရွဲၣ်), တၢ်ဆိၣ်ဂ့ၤပျၢ်-သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)တဖၣ်န့ၣ်လီၤ. ဝဲၤကျိၤလၢမၤသကိးတၢ်လၢ ကရူၢ်(၁)မ့ၢ်ဝဲ- တၢ်ကဟုကယာ်ဒီး တၢ်ကူၣ်လိၣ်တၢ်ဝဲၤကျိၤႇ ပိာ်မုၣ်ဝဲၤကျိၤႇ ခရံာ်ဖိတၢ်မၤဂ့ၤမၤစၢၤဒီး တၢ်ဂုၤထီၣ်ပသီထီၣ်ဝဲၤကျိၤႇ တၢ်ဘၣ်ထဲတွုၤအိၣ်လိာ်သးဝဲၤကျိၤ ဒီးလံာ်လဲၢ်ဒီးတၢ်ဆဲးတၢ်လၤဝဲၤကျိၤ တဖၣ်န့ၣ်လီၤ. ကီၢ်ခၢၣ်စးလၢဟဲထီၣ် တၢ်ရဲၣ်တၢ်ကျဲၤတဖၣ် မ့ၢ်ဝဲ ကီၢ်ဘျံးႇ ကီၢ်တီအူသၣ်တီၣ်ဘှဲမိၤၦၤႇ ကီၢ်ပသံၣ်မၠီမၠးႇ ကီၢ်ပၠံၣ်-သၣ်ယၣ်ဝတံၣ်ႇ  ကီၢ်ဆီထံးႇ ကီၢ်ပကိတကူၣ်ႇ ကီၢ်ဟီကတးႇ ကီၢ်တီအူပကူႇ ကီၢ်ကၠးအ့ႇ ကီၢ်ကယါမိၢ်ၦၢ်ႇ ကီၢ်ဒဝဲၣ်ဘျံးႇ ကီၢ်ချၢၣ်လွံၢ်ထူၣ်ႇ တီအူကီၢ်ကဲၤခၢၣ်ကဲၤဘါႇ ကီၢ်မၠိၣ်ႇ ကီၢ်ထးခီႇ ကီၢ်ဖၣ်အၣ်မီၣ်လမၠဲၣ် ဒီး ကီၢ်တကူၣ်တဖၣ်န့ၣ်လီၤ. ခၢၣ်စးဟဲခဲလၢာ် အိၣ်ဝဲ(၂၆)ဂၤန့ၣ်လီၤ.

ၦၤကညီဘျၢထံခဝ့ၡၢၣ် နံၣ်ကယၤ(၂၁)မံးၡၢၣ်တၢ်တိာ်ကျဲၤ သၢပတီၢ်တပတီၢ် ကရူၢ်(၄)လၢအမ့ၢ် တၢ်ဃုထံၣ်န့ၢ်ကျိာ်စ့ကရူၢ်အံၤ အိၣ် ဒီး တၢ်ဆါတၢ်ၦ့ၤဖဲ လါနိၣ်ဝ့ဘၢၣ်(၂၂)သီႇ ၂ဝ၂၅အနံၤ ဖဲ၁၂၁(ဃ)အလူၣ်န့ၣ်လီၤ. တၢ်ရဲၣ်တၢ်ကျဲၤတဘျီအံၤ အိၣ်ဒီးဝဲၤကျိၤတဖၣ် ပာ်ဖှိၣ် မၤသကိး တၢ်န့ၣ်လီၤ.အိၣ်ဒီးတၢ်အီၣ်တၢ်အီအကလုာ်ကလုာ်အကျးႇ တၢ်ဒီးတၢ်လၤအကျးႇ လံာ်လဲၢ်အကျးတဖၣ်န့ၣ်လီၤ.

ၦၤကညီဘျၢထံခဝ့ၡၢၣ် နံၣ်ကယၤ(၂၁)မံးၡၢၣ်တၢ်တိာ်ကျဲၤ သၢပတီၢ်တပတီၢ် ကရူၢ်တဖၣ်အိၣ်ဒီး တၢ်ဟူးတၢ်ဂဲၤတဖၣ်န့ၣ်လီၤ. ကရူၢ်(၃)လၢအမ့ၢ် တၢ်ဒုးဆူၣ်ထီၣ်တၢ်အိၣ်ဖှိၣ်တၢ်ရဲၣ်တၢ်ကျဲၤ ကရူၢ်အံၤအိၣ်ဒီး တၢ်ဟ့ၣ်လီၤခိၣ်ဖးလၢ ကီၢ်ဝဲၤလီၢ်တဖၣ်အတၢ်သးဝံၣ် သတြီၤ''ဘျၢထံခရံာ်ဖိ တၢ်စူၢ်တၢ်နာ်အဂံၢ်ထံး'' ဘၣ်တၢ်မၤအီၤဖဲ ပၢဆှၢတၢ်ကမံးတံာ်တၢ်အိၣ်ဖှိၣ်ဝံၤ လါနိၣ်ဝ့ဘၢၣ်(၁၉)သီဟါ(၄)နၣ်ရံၣ်ႇ ၂ဝ၂၅အနံၤ ဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ်တၢ်အိၣ်ဖှိၣ်ဒၢးန့ၣ်လီၤ. တၢ်ရဲၣ်တၢ်ကျဲၤအံၤ ၦၤပၢၤလီၢ်ဆ့ၣ်နီၤ-သရၣ်ဒိၣ် စၢ်ဟ့ၣ်ဂ့ၤ (ကရူၢ်ခိၣ်), တၢ်တဲဖျါတၢ်သတြီၤအဂ့ၢ်လၢ သရၣ်မုၣ်ဒီးကထၢၣ်ဂ့ၤဂ့ၤထူ(ၦၤဘၣ်မူဘၣ်ဒါ), တၢ်ဟ့ၣ်လီၤခိၣ်ဖးလၢ သရၣ်မုၣ်ဒိၣ် ဒီးကထၢၣ်လ့ထူ (နံၣ်ကယၤ(၂၁)တၢ်တိာ်ကျဲၤ သၢပတီၢ်တပတီၢ် ဖိးမံမူဒါခိၣ်), တၢ်ထုကဖၣ်ဆိၣ်ဂ့ၤပျၢ်တၢ်လၢ သရၣ်ဒိၣ်ယွၤဒုးမူ(နဲၣ်ရွဲၣ်)န့ၣ်လီၤ. ၦၤဟဲထီၣ် တၢ်ရဲၣ်တၢ်ကျဲၤ အံၤခဲလၢာ်အိၣ်ဝဲ (၈၃)ဂၤန့ၣ်လီၤ.ကီၢ်(၁၆)ဘ့ၣ်နုာ်လီၤသတြီၤသကိး ဒီး ကီၢ်လၢဒိးန့ၢ်ခိၣ်ဖးတဖၣ်မ့ၢ်ဝဲႇ ခိၣ်ဖးတၢ-ကီၢ်မၠီမၠးႇ ခိၣ်ဖးခံ-ကီၢ်ဆီထံးႇ ခိၣ်ဖးသၢ-ကီၢ်တီအူသၣ်တီၣ်ဘှဲမိၤၦၤန့ၣ်လီၤ.

ၦၤကညီဘျၢထံခဝ့ၡၢၣ် နံၣ်ကယၤ (၂၁)မံးၡၢၣ်တၢ်တိာ်ကျဲၤ သၢပတီၢ်တပတီၢ် ကရူၢ်(၄) တၢ်ဃုထံၣ်ကျိၣ်စ့တၢ်ရဲၣ်တၢ်ကျဲၤ အိၣ်ဒီးတၢ်အိၣ်ဖှိၣ်တၢၣ်ပီၣ်သကိး ဘၣ်ထဲဒွီး တၢ်ကမၤသကိး တၢ်ဆါတၢ်ၦ့ၤလၢ တၢ်ဃုထံၣ်န့ၢ်ကျိၣ်စ့လၢ ၂ဝ၂၅နံၣ်အဂီၢ် ဖဲ လါအီကူာ်(၇)သီႇ ဟါ(၁)နၣ်ရံၣ် ဖဲ(၃၉၆) ဝဲၤလီၢ် တၢ်အိၣ်ဖှိၣ်ဒၢးန့ၣ်လီၤ. ကရူၢ်အံၤ ၦၤပၢၤလီၢ်ဆ့ၣ်နီၤမ့ၢ်ဝဲ- သရၣ်မုၣ်ၡံထၣ်ဖီ(ၦၤပၢၤစ့) ဒီး ကမံးတံာ်ဖိတဖၣ် မ့ၢ်ဝဲ ဝဲၤကျိၤတဖၣ်အၦၤနဲၣ်တၢ်တဖၣ်န့ၣ်လီၤ.

နံၣ်ကယၤ(၂၁) သၢပတီၢ်တပတီၢ်ႇ မံးၡၢၣ်တၢ်တိ၁်ကျဲၤ-ကရူၢ်(၃)
တၢ်ဒုးဆူၣ်ထီၣ်တၢ်အိၣ်ဖှိၣ်တၢ်ရဲၣ်တၢ်ကျဲၤ

ၦၤကညီဘျၢထံခဝ့ၡၢၣ်အိၣ်ဒီး နံၣ်ကယၤ၂၁ႇ သၢပတီၢ်တပတီၢ်ႇ ကရူၢ်-၁ အိၣ်ဒီး တၢ်ဃိထံတၢ်မၤလိ အံၤဘၣ်တၢ်မၤအီၤဖဲ (၁၈-၂ဝ.၂ဝ၂၅) တၢတဘျီ ဒီး (၂၅-၂၇.၂.၂ဝ၂၅) ခံဘျီတဘျီ လၢ ၁၂၁(ဃ)ႇ နံၣ်(၁ဝဝ) တၢ်သူၣ်ထီၣ် န့ၣ်လီၤ. တၢတဘျီကီၢ်ခၢၣ်စးသ့ၣ်တဖၣ်ထီၣ်သကိးတၢ်မၤလိအိၣ်ဝဲ (၁၃)ဂၤဒီး ခံဘျီတဘျီအိၣ်ဝဲ(၇)ဂၤန့ၣ်လီၤ.သရၣ်သိၣ်လိတၢ်တဖၣ်မ့ၢ်ဝဲ-(၁)သရၣ်လဲမယၢၣ်(ကူၣ်သ့ဂံၢ်ထံး)ႇ (၂)သရၣ်စၤတ့ၣ်ပၠိ(ကူၣ်သ့ဂံၢ်ထံး) န့ၣ်လီၤ. ဝဲၤကျိၤလၢအမၤသကိးတၢ်တဖၣ်မ့ၢ်ဝဲ-လံ၁်လဲၢ်ဒီးတၢ်ဆဲးတၢ်လၤဝဲၤကျိၤႇ တၢ်ကဟုကယ၁်ဒီးတၢ်ကူၣ်လိ၁်တၢ်ဝဲၤကျိၤႇ ပိ၁်မုၣ်ဝဲၤကျိၤႇ ခရံ၁်ဖိတၢ်မၤဂ့ၤမၤစၢၤဒီးတၢ်ဂုၤထီၣ်ပသီထီၣ်ဝဲၤကျိၤႇ တၢ်ဘၣ်ထွဲတုၤအိၣ်လိ၁်သးဝဲၤကျိၤ သ့ၣ်တဖၣ်န့ၣ်လီၤ.

ၦၤကညီဘျၢထံခဝ့ၡၢၣ်ႇ သရၣ်သမါဝဲၤကျိၤဒီး နံၣ်ကယၤ(၂၁)မံးၡၢၣ်တၢ်တိ၁်ကျဲၤသၢပတီၢ်တပတီၢ်ကရူၢ်(၂), တၢ်သုးထီထီၣ်ခိၣ်နၢ်အတၢ်သ့တၢ်ဘၣ်တၢ်ရဲၣ်တၢ်ကျဲၤအရူၢ် ပ၁်ဖှိၣ်မၤသကိးတၢ်ရဲၣ်တၢ်ကျဲၤလၢအမ့ၢ် တၢ်ဟ့ၣ်ခီဟ့ၣ်နီၤႇ "တၢ်အရ့ဒိၣ်လၢ တၢ်အိၣ်ဖှိၣ်တၢ်သိၣ်မိၢ်ၦၢ်ဒီးအဒ့" လၢဆဲးကျိးန့ၢ်တီၤဖဲ လါနိၣ်ဝ့ဘၢၣ်(၇)သီႇ ၂ဝ၂၄နံၣ် ဟါ(၇းဝဝ)နၣ်ရံၣ်န့ၣ်လီၤ. သရၣ်သိၣ်လိတၢ်မ့ၢ်ဝဲ-သရၣ်ဒိၣ်အဲၣ်ခဲလၢ၁် န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤလၢဆဲးကျိးန့ၢ်တီၤအိၣ်ဝဲ (၇ဝ)ဘျဲၣ် လၢကီၢ်သ့ၣ်တဖၣ်န့ၣ်လီၤ. ကရူၢ်(၂), ဝဲၤကျိၤပ၁်ဖှိၣ်မၤသကိးတၢ်တဖၣ်မ့ၢ်ဝဲ-သရၣ်သမါဝဲၤကျိၤႇ တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ဝဲၤကျိၤလၢသးစၢ်တၢ်မၤဂီၢ်ႇ ယွၤဂ့ၢ်ပီညါဝဲၤကျိၤႇ ထုးထီၣ်ရၤလီၤလံ၁်လဲၢ်ဝဲၤကျိၤ တဖၣ်န့ၣ်လီၤ.

မ့ၢ်လၢကစၢ်ယွၤအဘျုးအဖှိၣ်အဃိ ၦၤကညီဘျၢထံခဝ့ၡၢၣ်နံၣ်ကယၤ(၂၁) သၢပတီၢ်တပတီၢ် အတၢ်ဖံးတၢ်မၤတဖၣ်ဘၣ်တၢ်စးထီၣ်အီၤလၢ တၢ်ဂံၢ်ဆူၣ်ဘါဆူၣ်အပူၤန့ၣ်လီၤ. ပဝဲကရူၢ်ခံအပူၤ ၦၤမၤသကိးတၢ်တဖၣ်မ့ၢ်ဝဲ- တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ သရၣ်သမါဝဲၤကျိၤႇ ယွၤဂ့ၢ်ပီညါဝဲၤကျိၤႇ ထုးထီၣ်ရၤလီၤလံ၁်လဲၢ်ဝဲၤကျိၤဒီး ဝဲၤကျိၤလၢသးစၢ်တၢ်မၤဂီၢ်တဖၣ်န့ၣ်လီၤ.
ပဝဲကရူၢ်ခံအံၤပအိၣ်ဒီးတၢ်ရဲၣ်တၢ်ကျဲၤလၢအမ့ၢ် တၢ်သ့ကွဲးဒုးအိၣ်ထီၣ်တၢ်အိၣ်ဖှိၣ်အတၢ်သိၣ်တၢ်သီ (Church Constitution By Law) ဒီးပစးထီၣ်မၤဘၣ်တၢ်မၤလိ(၃)သီဖဲ လါအီကူာ် ၇-၉ႇ ၂ဝ၂၄အနံၤန့ၣ်လီၤ. တၢ်မၤလိအံၤဘၣ်တၢ်မၤအီၤဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ် ၁၂၁(ဃ)အလူၣ်န့ၣ်လီၤ.ၦၤဟဲထီၣ်တၢ်မၤလိတဖၣ်မ့ၢ်ဝဲကီၢ်အဘ့ၣ်(၂ဝ) အခၢၣ်စးလၢအမ့ၢ်တကီၢ်(၂)ဂၤဒီး ကီၢ်လၢအဟဲထီၣ်တၢ်မၤလိတဘျီအံၤအိၣ်ဝဲ ကီၢ်(၁၈)ဘ့ၣ်ဒီး ၦၤမၤလိတၢ်ဖိအိၣ်ဝဲ (၃၆)ဂၤန့ၣ်လီၤ.
ၦၤလၢအသိၣ်လိတၢ်တဖၣ်မ့ၢ်ဝဲ ဒ်လ၁်အံၤအသိးန့ၣ်လီၤ.
၁. ဘၣ်မနုၤတၢ်အိၣ်ဖှိၣ်တဖၣ်ကကွဲးဒုးအိၣ်ထီၣ်တၢ်အိၣ်ဖှိၣ်အတၢ်သိၣ်တၢ်သီ
(Church Constitution By Law) အံၤအကါဒိၣ်ဝဲန့ၣ်လဲၣ်
ၦၤသိၣ်လိတၢ်-သရၣ်ဒိၣ်အဲၣ်ခဲလၢာ်(ကၠူၣ်တီကညီဘျၢထံတၢ်အိၣ်ဖှိၣ်)
၂. တၢ်ကွဲးသကိးတၢ်အိၣ်ဖှိၣ်အတၢ်သိၣ်တၢ်သီ (Workshop)
ၦၤတီခိၣ်ရိၣ်မဲတၢ်-သရၣ်ဒိၣ်ဆၣ်ဟ့ၣ်ဂ့ၤကဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ကူၣ်ဘၣ်ကူၣ်သ့အတၢ်ရဲၣ်တၢ်ကျဲၤ အကျါလံ၁်ညိၣ်သိၣ်ဒိၣ်ကမံးတံ၁်ဒီး ကရူၢ်ဖိတဖၣ်အိၣ်ဒီး တၢ်ထံၣ်လိ၁်အိၣ်ဖှိၣ်သကိးဖဲ လါယူၤ(၆)သီႇ ၂ဝ၂၄နံၣ် (ဂီၤ ၈း၃ ဝတုၤ ဟါ၄းဝဝ)နၣ်ရံၣ် ဖဲ ၦၤကညီဘျၢထံယွၤဂ့ၢ်ပီညါ ဖၠၣ်စိမိၤႇ ဖုခၠံးမီၣ်တၢ်သူၣ်ထီၣ်ႇ တၢ်အိၣ်ဖှိၣ်ဒၢးႇ အ့စ့ၣ်န့ၣ်လီၤ. တၢ်အိးထီၣ်တၢ်ရဲၣ်တၢ်ကျဲၤကတီၢ် ၦၤပၢၤလီၢ်ဆ့ၣ်နီၤမ့ၢ်ဝဲ သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ ကမံးတံ၁်ပၢဆှၢတၢ်ရ့လိ၁်မၤသကိးတၢ်သးခုကစီၣ်)ႇ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)ႇ ကတိၤဆၢဂ့ၤဆၢဝါတၢ်ဝံၤ တၢ်ထုကဖၣ်လၢ သရၣ်ဒိၣ်ဒီးကထၢၣ်စ့စီ န့ၣ်လီၤ. အိၣ်ဒီးတၢ်ဒုးသ့ၣ်ညါလိ၁်သးဒီး လဲၤဆူ ကရူၢ်ဖိတဖၣ်အတၢ်ဟ့ၣ်ထီၣ် န့ၣ်လီၤ. ကညီကျိ၁်ႇ Music, တၢ်မၤလိလံ၁်စီဆှံႇIT ဒီး Fine Art အကရူၢ်ခိၣ်တဖၣ် ဟ့ၣ်ထီၣ်တၢ်ဝံၤ ပိ၁်ထွဲထီၣ်အခံလၢ တၢ်သ့ကွၢ် တၢ်ဟ့ၣ်ကူၣ်တဖၣ်လၢ ကရူၢ်ဖိတဖၣ်န့ၣ်လီၤ. ၦၤပၢၤလီၢ်ဆ့ၣ်နီၤ တီခိၣ်ရိၣ်မဲလၢ တၢ်ကတိၤသကိးဒီး ဆူညါတၢ်သုးတၢ်ကျဲၤအဂီၢ်န့ၣ်လီၤ. ကရူၢ်ဖိလၢဟဲထီၣ်တၢ်ရဲၣ်တၢ်ကျဲၤအံၤ ခဲလၢ၁် အိၣ်ဝဲ(၁၇) ဂၤန့ၣ်လီၤ.

ၦၤကညီဘျၢထံခဝ့ၡၢၣ် နံၣ်ကယၤ(၂၁) သၢပတီၢ်တပတီၢ်ႇ ကရူၢ်(၁) တၢ်ဃုထံတၢ်ရဲၣ်တၢ်ကျဲၤအိၣ်ဒီး (တၢ်ဃုထံ တၢ်မၤလိ) လၢ ကီၢ်အဘ့ၣ်(၁ဝ)အဂီၢ် တၢ်မၤလိဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ် န့ၣ်လီၤ. ဘၣ်တၢ်စးထီၣ်အီၤဖဲ လါယူၤ(၁၂-၁၃)သီႇ ၂ဝ၂၄နံၣ် န့ၣ်လီၤ.အိၣ်ဒီးတၢ်အိးထီၣ်တၢ်ရဲၣ်တၢ်ကျဲၤလၢ တၢ်ဘူၣ်တၢ်ဘါန့ၣ်လီၤ. တၢ်ဘါကတီၢ်ၦၤပၢၤလီၢ်ဆ့ၣ်နီၤ-သရၣ်မုၣ်ဆၢန့ၢ်ဂ့ၤ(လံ၁်လဲၢ်ဒီးတၢ်ဆဲးတၢ်လၤဝဲၤကျိၤႇ ၦၤနဲၣ်တၢ်)ႇ တၢ်ကစီၣ်-သရၣ်မုၣ်ၡံထၣ်ဖီ(ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ ၦၤနဲၣ်တၢ်)ႇ တၢ်ထုကဖၣ်-သရၣ်မုၣ်နံထၣ်(တၢ်ကဟုကယ၁်ဒီးတၢ်ကူၣ်လိ၁်တၢ်ဝဲၤကျိၤႇ ၦၤနဲၣ်တၢ်) ဒီးပိ၁်ထွဲထီၣ်အခံဒီးတၢ်ဒုးသ့ၣ်ညါလိ၁်သးလၢ ကရူၢ်ခိၣ်-သရၣ်မုၣ်ဂ့ၤဂ့ၤထူ(တၢ်ဘၣ်ထွဲတုၤအိၣ်လိ၁်သးဝဲၤကျိၤႇ ၦၤနဲၣ်တၢ်) န့ၣ်လီၤ. အိၣ်ဒီးတၢ်ပ၁်ဖျါ နံၣ်ကယၤ(၂၁) တၢ်တိ၁်ကျဲၤသၢပတီၢ်တပတီၢ် အတၢ်ပညိၣ်ကွၢ်စိႇ တၢ်ကွၢ်စိဒီး တၢ်ဃုထံတၢ်ရဲၣ်တၢ်ကျဲၤ တၢ်ပညိၣ်ကွၢ်စိဒီး တၢ်ဖံးတၢ်မၤတဖၣ်န့ၣ်လီၤ. ကီၢ်လၢဟဲထီၣ်တဖၣ်မ့ၢ်ဝဲ- ကီၢ်တကူၣ်ႇ ကီၢ်ပကိတကူၣ်ႇ ကီၢ်မၠီမၠးႇ ကီးထးခီႇ ကီၢ်ကယါဘျၢထံခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ်ႇ ကီၢ်တီအူပကူႇ ကီၢ်တီအူသၣ်တီၣ်ဘှဲမိၤၦၤႇ ကီၢ်ဖၣ်အၣ်မီၣ်လမၠဲၣ်ႇ ကီၢ်ထးခီႇ ကီၢ်မၠိၣ် ဒီးခဲလၢ၁်ဟဲထီၣ်(၂ဝ)ဂၤ န့ၣ်လီၤ. တၢ်မၤလိအံၤမ့ၢ်ဝဲ(၂)သီတၢ်မၤလိန့ၣ်လီၤ.