Karen Baptist Convention

ၦၤကညီဘျၢထံခဝ့ၡၢၣ် ပိာ်ခွါတၢ်ရဲၣ်တၢ်ကျဲၤမူဒါခိၣ်တဖၣ် ဟံးန့ၢ်သကိးတၢ်ဘါတၢ်ရဲၣ်တၢ်ကျဲၤ ဖဲမုၢ်ဆၣ်ဂီၤတၢ်ဘါ  (၂၂.၉.၂ဝ၂ ၅)အနံၤန့ၣ်လီၤ. ၦၤပၢၤလီၢ်ဆ့ၣ်နီၤ-သရၣ်နာ်စိရံးႇ တၢ်ထုကဖၣ်-သရၣ်ကၠဲဖရံၣ်လ့ႇ တၢ်ကစီၣ်- သရၣ်တီလီၤလးႇ တၢ်သးဝံၣ်ဆဲးတိၤ -သရၣ်သးဂ့ၤကိႇ ဖးလံာ်စီဆှံ ကိးထီၣ်တၢ်သးဝံၣ်-သရၣ်အဲၣ်ဘျုးန့ၣ်လီၤ.

ဖဲလါအီကူ၁် (၂၈)သီႇ ၂ဝ၂၅နံၣ် ကီၢ်ပကိတကူၣ်ႇ ဝဲၤလီၢ်ၦၤမၤသကိးတၢ်အဂီၢ်အိၣ်ဒီး တၢ်မၤလိအဘၣ်ထွဲဒီး Data Security န့ၣ်လီၤ. ၦၤဟဲထီၣ်တၢ်မၤလိသ့ၣ်တဖၣ်အိၣ်ဝဲ (၁၃)ဂၤန့ၣ်လီၤ. ခီဖျိ ကီၢ်ပကိတကူၣ် တၢ်ဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤဒီးတၢ်ဘၣ်ထွဲတုၤအိၣ်လိ၁်သးဝဲကျိၤ သ့ၣ်တဖၣ်မၤသကိးတၢ်ဒီး ကွဲမု၁် သရၣ်ကၠဲးစၢၣ်ကၠါ(ခဝ့ၡၢၣ်တၢ်ဘၣ်ထွဲတုၤအိၣ်လိ၁်သးဝဲၤကျိၤႇ ၦၤနဲၣ်တၢ်သဃဲၤ) န့ၣ်လီၤ. စိၤဆၢကတီၢ်ခဲအံၤ တၢ်လၢကမၤလီၤပှီၢ်ကွံ၁်ၦၤကျဲတဘိလၢအမ့ၢ် တၢ်ဟုၣ်န့ၢ်ပတၢ်လၢ Online နတကပၤန့ၣ် အိၣ်ဝဲဒၣ်အါမးအဃိ ပနီၢ်ကစၢ်မ့ၢ်ဂ့ၤႇ ပတၢ်ကရၢကရိအဂီၢ်မ့ၢ်ဂ့ၤန့ၣ် ပဘၣ်အိၣ်ဒီးတၢ်ပလီၢ်ပဒီပသးလၢ တၢ်သူတၢ် ပီးတၢ်လီသ့ၣ်တဖၣ်အဖီခိၣ်န့ၣ် မ့ၢ်တၢ်ဟ့ၣ်ဒုးပလီၢ်အကျိၤအကျဲသ့ၣ်တဖၣ် လၢၦၤဟံးန့ၢ်ပတၢ်န့ၢ်သါကသ့ဒ်လဲၣ် သ့ၣ်တဖၣ်န့ၣ်လီၤ. ၦၤထီၣ်တၢ်မၤလိသ့ၣ်တဖၣ်အိၣ်ဒီး တၢ်ဟ့ၣ်ခီဟ့ၣ်နီၤလိ၁်သးတၢ်လဲၤခီဖျိသ့ၣ်တဖၣ်စ့ၢ်ကီး န့ၣ်လီၤ.

ဖဲလါစဲးပတ့ဘၢၣ် (၂-၅)သီႇ ၂ဝ၂၅ နံၣ်န့ၣ် ၦၤကညီဘျၢထံခဝ့ၡၢၣ်ႇ လံ၁်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး ''တၢ်သ့ကွဲးလံ၁် တၢ်မၤလိ'' ဖဲ ခဝ့ၡၢၣ်နံၣ်(၁ဝဝ) တၢ်စံးဘျုးစံးဖှိၣ်တၢ်သူၣ်ထီၣ်ႇ အလူၣ်ႇ ဝ့ၢ်တကူၣ်န့ၣ်လီၤ. (၂.၉.၂ဝ၂၅) ဂီၤ (၇းဝဝ) န့ၣ် တၢ်စးထီၣ်တၢ်ဘူၣ်တၢ်ဘါ တၢ်ရဲၣ်တၢ်ကျဲၤဒီး တၢ်သ့ၣ်ညါလိ၁်သးန့ၣ်လီၤ. တၢ်မၤလိအံၤကီၢ်(၁၁)ကီၢ် ဟဲထီၣ်ဝဲလီၤ. တၢ်မၤလိကၠိဖိနီၣ်ဂံၢ်အိၣ်ဝဲ (၁၈)ဂၤန့ၣ်လီၤ. န့ၣ်လီၤ. သရၣ်လၢအသိၣ်လိလံ၁်စီဆှံမ့ၢ်ဝဲ သရၣ်ဒိၣ်ဒီးကထၢၣ်ၡမူၤအ့လးတီ ဒီး သရၣ်ဒိၣ်ဒီးကထၢၣ်စ့စီလီၤ. လၢတၢ်ကတိၤလီၤဆီတခီန့ၣ်မ့ၢ်ဝဲ သရၣ်မုၣ်ဒီးကထၢၣ်ခၠံၣ်ဖိဒီး သရၣ်မုၣ်ၡါရိၣ်ဖီလီၤ. သရၣ်မုၣ်ဒိၣ်တ့ၣ်မ့ၣ်ဖၠူၣ်သိၣ်လိဝဲ ''တၢ်သ့ကွဲး ဖှိၣ်ရၤဒီး တၢ်သ့ကွဲးတၢ်ကစီၣ်'' အဂ့ၢ်လီၤ. ဒီး သရၣ်ဒိၣ်ဒီးကထၢၣ်သီကၠံၣ်သိၣ်လိဝဲ How to be a good writer အဂ့ၢ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ လၢတၢ်မၤသကိးတၢ်ဒီး ကရူၢ်(၃) ''တၢ်ဒုးဆူၣ်ထီၣ် တၢ်အိၣ်ဖှိၣ်တၢ်ရဲၣ်တၢ်ကျဲၤ'' ဒီးတီခိၣ်ရိၣ်မဲသုးကျဲၤမၤ ဘၣ်  ''ဘျၢထံခရံာ်ဖိတၢ်စူၢ်တၢ်နာ်အဂံၢ်ထံး" တၢ်သးဝံၣ်ပြၢ လၢကီၢ်အဘ့ၣ်(၂ဝ)ဝဲၤလီၢ်တဖၣ်န့ၣ်လီၤ. ကီၢ်နုာ်လီၤသတြီၤတၢ်အိၣ်ဝဲ(၁၆)ဘ့ၣ်န့ၣ်လီၤ. စံၣ်ညီၣ်ကီၢ်တဖၣ်လၢအမ့ၢ်-သရၣ်ဒိၣ်တီသးဖှံႇ သရၣ်ရ့ဘိႇ သရၣ်ဒီးကထၢၣ်န့ၢ်လ့အီၣ်တဖၣ် ထံၣ်လိာ်သး ဖဲလါစဲးပတ့ဘၢၣ်(၉)သီႇ မုၢ်ဆါ(၁)နၣ်ရံၣ်လၢ ဝဲၤကျိၤအဒၢးန့ၣ်လီၤ. တၢ်ဒုးသ့ၣ်ညါ ၦၤန့ၢ်ခိၣ်ဖး ဒီးတၢ်ဟ့ၣ်လီၤခိၣ်ဖးကမ့ၢ်ဝဲဖဲ လါနိၣ်ဝ့ဘၢၣ်(၁၉)သီႇ၂ဝ၂၅ ဟါပၢဆှၢတၢ်ကမံးတံာ် တၢ်အိၣ်ဖှိၣ်ဝံၤအဆၢကတီၢ်န့ၣ်လီၤ.

ၦၤကညီဘျၢထံခဝ့ၡၢၣ် ပိာ်ခွါၦၤနဲၣ်တၢ်သဃဲၤတဖၣ် ဟံးန့ၢ်သကိးတၢ်ဘါတၢ်ရဲၣ်တၢ်ကျဲၤ ဖဲမုၢ်ဆၣ်ဂီၤတၢ်ဘါ  (၁၅.၉.၂ဝ၂ ၅)အနံၤန့ၣ်လီၤ. ၦၤပၢၤလီၢ်ဆ့ၣ်နီၤ-သရၣ်ဒီးကထၢၣ်န့ၢ်လ့အီၣ်ႇ တၢ်ထုကဖၣ်-သရၣ်ဝါကပီၤစ့ႇ တၢ်ကစီၣ်- သရၣ်န့ၢ်ဘျုးႇ တၢ်သးဝံၣ်ဆဲးတိၤ -သရၣ်ဆၣ်ထူကီၢ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤႇ ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ခရံာ်ဖိတၢ်မၤဂ့ၤမၤစၢၤဒီးတၢ်ဂုၤထီၣ်ပသီထီၣ်ခိၣ်နၢ်ဝဲၤကျိၤႇ တၢ်ဘၣ်ထဲတွုၤအိၣ်လိာ်သးဝဲၤကျိၤ တဖၣ်ပာ်ဖှိၣ်ထီၣ်သးဒီး လဲၤဘူၣ်သကိးဘါသကိးရ့လိာ်မုာ်လိာ်သကိးဘၣ် သးဒီး ကိတဲစူးတၢ်မၢလီၢ် ဖဲလါစဲးပတ့ဘၢၣ်(၁၄)သီႇ ၂ဝ၂၅အနံၤန့ၣ်လီၤ. အိၣ်ဒီးတၢ်မၤလိလံာ်စီဆှံႇ တၢ်ဘူၣ်သကိးဘါသကိး တၢ်လၢမုၢ်ဆါတၢ်ဘါကတီၢ်စ့ၢ်ကီးန့ၣ်လီၤ.ဝဲၤကျိၤၦၤမၤသကိး တၢ်လဲၤသကိးဝဲ(၁၁)ဂၤန့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် သုးကျဲၤမၤဝဲ တလါတဘျီတၢ်ရ့လိာ်မုာ်လိာ်ဒီး တၢ်မၤလိလံာ်စီဆှံ ဖဲ လါစဲးပတ့ပဘၢၣ်(၁၃)သီႇ ၂ဝ၂၅အနံၤႇ ဟါ(၇းဝဝ)နၣ်ရံၣ်  လၢ ဆဲးကျိးန့ၢ်တီၤန့ၣ်လီၤ. ၦၤဟ့ၣ်ခီဟ့ၣ်နီၤ တၢ်မ့ၢ်ဝဲ-သရၣ်မုၣ်အဲမၣ်ထူ လၢကီၢ်တကူၣ်လံာ်စီဆှံကၠိန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ -သရၣ်ဒူတီ(တၢ်ရဲၣ်တၢ်ကျဲၤမူဒါခိၣ်)ႇ သရၣ်မုၣ်စၢ်ဘျုးဝါ(ၦၤနဲၣ်တၢ်) ကတိၤဆၢဂ့ၤဆၢဝါတၢ်ႇ သရၣ်တီလိၤမူ(ၦၤနဲၣ်တၢ်သဃဲၤ) ထုကဖၣ်လၢ ၦၤခဲလၢာ်အဂီၢ်န့ၣ်လီၤ. နၢ်ဟူဘၣ် တၢ်သးဝံၣ်လၢ ကီၢ်ဒဝဲၣ်ဘျံးကျဲးစၢကရၢ ဒီးသးစၢ်ဟဲထီၣ်ခဲလၢာ်အိၣ်ဝဲ(၇ဝ)ဘျဲၣ် လၢ (devices)(၄၅)ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်တိစၢၤမၤစၢၤကရၢ အိၣ်ဒီးတၢ်ကွၢ်ကဒါက့ၤတၢ်ဖံးတၢ်မၤ ဘၣ်တၢ်မၤအီၤဖဲ လါအီကူာ် ၂၆-၂၈ႇ ၂ဝ၂၅ ဖဲ ငွ့ၣ်ဆီၣ်န့ၣ်လီၤ. တၢ်ရဲၣ်တၢ်ကျဲၤတဘျီအံၤ အိၣ်ဒီးတၢ်ပာ်ဖျါဒုးနၢ်ပၢၢ်တၢ်ဖံးတၢ်မၤႇ တၢ်ဟ့ၣ်ကူၣ်တၢၣ်ပီၣ်သကိးလၢ န့ၣ်လီၤ. ၦၤဟဲထီၣ်တၢ်ရဲၣ်တၢ်တဖၣ်မ့ၢ်ဝဲ- ကမံးတံာ်မၤတၢ်တဖၣ် ဒီးၦၤဘၣ်မူဘၣ်ဒါလၢ တၢ်တိာ်ကျဲၤတဖၣ်န့ၣ်လီၤ.

ၦၤကညီဘျၢထံခဝ့ၡၢၣ် ဝဲၤလီၢ် အိၣ်ဒီးမုၢ်ဆၣ်ဂီၤတၢ်ဘူၣ်သကိးဘါသကိးတၢ် ကိးနွံဒဲးန့ၣ်လီၤ. ဖဲ(၈.၉.၂ဝ၂၅)အနံၤ ၦၤဟံးန့ၢ်တၢ်ဆၢကတီၢ်မ့ၢ်ဝဲ ပိာ်ခွါၦၤနဲၣ်တၢ်တဖၣ်န့ၣ်လီၤ.ၦၤပၢၤလီၢ်ဆ့ၣ်နီၤ-သရၣ်ဒိၣ်ဒီးကထၢၣ်မိစဲးသ့ႇ တၢ်ထုကဖၣ်-သရၣ်ဒီးကထၢၣ်တနၢ်ထူႇ တၢ်ကစီၣ်-သရၣ်ဝ့ဘံၣ်ႇ တၢ်သးဝံၣ်ဆဲတိၢ် -သရၣ်ဒိၣ်စၢ်ဟ့ၣ်ဂ့ၤႇ တၢ်ဆိၣ်ဂ့ၤပျၢ်-သရၣ်ဒိၣ်အဲးဒဝၢးတဖၣ်န့ၣ်လီၤ.

မ့ၢ်လၢယွၤအဘျုးအဃိ ၦၤကညီဘျၢထံခဝ့ၡၢၣ် ဘှီဝံၤဘၣ် တၢ်ပာ်သိလ့ၣ်အလီၢ် ဒီး ပာ်စီဆှံဘၣ်အီၤဖဲ လါစဲးပတ့ဘၢၣ်(၂)သီႇ မုၢ်ဆါ (၁၂)နၣ်ရံၣ် အဆၢကတီၢ်န့ၣ်လီၤ. သရၣ်ဒိၣ်ယွၤဒုးမူ (ခဝ့ၡၢၣ်နဲၣ်ရွဲၣ်) တီခိၣ်ရိၣ်မဲတၢ်ရဲၣ်တၢ်ကျဲၤႇ တၢ်တဲဖျါတၢ်လၢာ်ဘူၣ်လၢာ်စ့လၢ သရၣ်မုၣ်ၡံထၣ်ဖီ(ၦၤပၢၤစ့)ႇ တၢ်ထုကဖၣ်လၢ -သရၣ်မုၣ်ဒိၣ်ဒီးကထၢၣ်လ့ထူ(နဲၣ်ရွဲၣ်သဃဲၤ-တၢ်ပၢတၢ်ဆှၢ)ႇ ဒီးတၢ်ဆိၣ်ဂ့ၤပျၢ်လၢ သရၣ်မုၣ်ဒိၣ်မၠီၠမၠးဖီ(နဲၣ်ရွဲၣ်သဃဲၤ-တၢ်ရ့လိာ်မၤသကိးဒီးတၢ်ဂုၤထီၣ်ပသီထီၣ်)န့ၣ်လီၤ. ဝဲၤကျိၤၦၤနဲၣ်တၢ်ဒီး ၦၤနဲၣ်တၢ်သဃဲၤတနီၤ ဟဲပာ်စီဆှံသကိးန့ၣ်လီၤ.